El moaison d’ville
11 – Jules Verne din ch’consel
Edpu 1888 dusqu’à 1904, j’o té d’ech consel d’Anmiens, qu’cha foét seize énées. Adon, cha foét qu’j’alloés rédjulièrmint à l’moaison d’ville qu’ale o té étampie au 18ème sièke padzeur ches fondmints d’in batimint pu viu qu’i o té ragrandi pi raringé in sécant d’keups.
In 1888, j’o prouposé à Frédéric Petit, ech maire qu’i s’erporte, d’eme prinde dzeur es lisse. Après ène campanne mouvmintèe, j’o été éli pi j’o foais partie d’el 4ème conmission qu’ale s’otchupe ed ches afoères tchulturèles pi sociales : écolage public, musée, biblotèke, téyate, fètes publiques, délonmage ed ches rues, ayude publique. J’indosse itou des responsabilitès sociales dimpré l’caisse ed ches écoles pi à ch’burieu ed carité. J’édvoés miler ches finances d’ech téyate pi ej m’otchupoés étou d’ches foères. Ch’est mi qu’j’o inaudjuré ech nouvieu chirque municipau in 1889 (mille uit chint quater vingt neu).
Pindant min mandot, ej m’o granmint intéressé à chl’ahansmint d’el ville pi j’apruve ed rawarder el bieuté d’el chité. J’o toudi ieu soin ed détouiller ches tchestions pour mi prinde ches boènes décisions. I n’y avoét des consels quasimint tous les jours pi ch’étoét gramint d’ouvrage, mais je n’o ieu d’l’agréymint pi j’y o déteupé d’l’inspiracion pour tchèques-in d’mes romans.
Enhui, y o ène bièle plache din l’moaison d’ville qu’ale o min nom.
Traduction Christiane DUVAL pour l'Agence régionale de la langue picarde
