Ch’viu téyate
12 - Jules Verne écriveus dramatique
Eme carière d’écriveus ale o kminché par ech téyate. Tout seu ou bin aveuc dz’eutes (Dumas ch’fiu, Michel Carré, Charles Wallut), j'o écrit éne trintaine ed pièches inter 1848 pi 1860. I nn’o huit qu’is ont été juées à ch’Téyate Lirique. Quand qu’ej m’o mis à foaire des romans, j’o continué à écrire pour el sène. In molé d’pus tard, aveuc l’ayude d’Adophe D’Ennery, j’o foait daler quéques-ins d’mes romans pour ech téyate, espécialmint : Le tour du monde en 80 jours (1874) pi Michel Strogoff (1880), qu’is dvientte des pièches espectaculaires aveuc edz effets espécials.
Edpus qu’j’o arivé Anmiens, in 1871, j’ene décesse point d’aler au téyate. Drè 1883, ej m’in voés foaire partie d’éne commission ed dis gins, qu’os lonme ches “adités”, qu’is décidtte d’ches ingajmints pour ches jueus d’comédie. Et pi, après qu’j’o été coési à ch’consel in 1888, j’o béyé pus fortémint à zz’afoaires d’ech téyate pi j’o récrit éne disainne ed raports, in tout zz’ans, dsu esn ouvrage.
In tant qu’consiller, ej vo tanmaints keups à ch’téyate aveuc Honorine, min blanc-bonnet. J’o meme pu vir ches piéches eq j’avoés récrites mi-mème : esz adaptacions d’ech Tour du monde en 80 jours (1877 pi 1880) pi ed Michel Strogoff (1882, 1893 pi 1900), mais étou d’mes euves ed jonnesse conme Onze jours de siège (1880) pi Un neveu d’Amérique (1888).
Traduction Olivier ENGELAERE pour l'Agence régionale de la langue picarde
