Ch’square Jules Boquet
13 - Cheus qu’is litte Jules Verne
Jules Verne, i n'o pos toudi été rconnu conme in écriveus ! A sn’époque, à keuse eq ses romans is avoétte in air sciintifique, i nn’y o des critiques qu’is ont dit eq cha n’étoét mie d’el litérature. Coèr après, os o dit qu’ches lives-lo is étoétte foke pour el jonnesse. Adon, Jules Verne pi sin dépulieus, Hetzel, is vouloétte s'adrécher à l’pus ed liseus possibe, sitant ches parints qu’ches jonnes gins. A tertous, is baytte l'plaisi ed l'avinture pi d’l’exotisme, tout in métant in leumière ches démuchages pi ches grandes afoaires ed leu tans.
A ch'vintième sièke, aprés chele mort ed Jules VERNE, pi l’disparucion d'ches édicions Hetzel, qu'is ont été racatées par HACHETTE, os n'truvoét pu foke ches lives à Jules VERNE eq din el « verde bibiotèque ».
Enuit, chl'euve Jules Verne i o erjoind chti d’ches grands romancieus d’ech dis-neuvième sièke, pi i est ravisé conme in ouvrage vraimint litéraire.
« Conme qu’j’avoés kér à m’pourméner din l’ville d’Anmien pi qu’j’alloés souvint à ch’téyate qu’i étoét fin prés, adon j’éroés bin apricié chl’aire ed jus-lo qu’ale o été ahansée ichi in 2019, pi qu'ale o été inspirée d'mes lives ».
Traduction Jean-Paul LEJEUNE pour l'Agence régionale de la langue picarde
