« Asseuré qu’ech wartier Henriville ch’est min wartier. In Sectimbe 1873 j’o acaté l’moaison à ch’niméro 44 d’ech boulevard Longueville pi après j’o été rester din l’grande moaison d’el rue Charles Dubois, adon ed 1873 à 1905 j’o dmeuré din ch’ wartier-lo.
In 1875 din « Ene vile éd rève » d’où qu’ej magine qu’ej m’ertreuve din Anmien din l’futur, ej voés l’rue Lemerchier qu’a s’ralonge oute d’min rgard, aveuc gramint de bièles moaisons din ch’prolongemint, adon qu’ech jour d’edvant ch’étoét coèr ches camps ! Ch’est conme si qu’in wartier il avoét cruchonné lo aveuc ses moaisons pi sz’églises. Pi énui, in vrai, ch’wartier il est lo !
Meume si qu’j’euve souvint din ch’chintre ville d’Anmien j’o ker étou d’em pourméner din ch’wartier-lo, o bin d’aler vir mes chochons qu’is y restte. »
Jules Verne il o pu vir ch’batichache ed l’église Sant Martin, inter 1869 pi 1877, dsu ches plans d’echl’architèque d’Anmien Louis Henry Antoine. Ech batimint il est étampi din ch’wartier Henriville, dsu éne plache qu’ale est rintourée d’abes pi d’moaisons.
Ch’est din chl’église Sant Martin, ech 28 ed March 1905, qu’l’intiérmint d’Jules Verne i s’o passé. Y avoét éne masse ed gins : des fameus pi coèr des gins qu’os n’connaissons point, pi qu’tertous is avoétte vnu pour li.
Traduction Marie-Claire VILLAIN pour l'Agence régionale de la langue picarde
