Jules Verne pi l’Société d’Hortitchulture
Ch’est pindant l’énée 1871 qu’ej su devnu in « makeu d’gueugues », ch’surptichet à chés Anmiénoés. Il o tnu à min tcheur ed m’achuchonner avuc des sociétés, pis po qu’in-ne ! I n’o éne, qu’ale est délonmée SHP, qu’cha vut dire « Société d’Hortitchulture ed Picardie ». Chèle-lo, j’l’o kér pus eq toute à keuse qu’n’y o ddin des chochons à mi, Edouard Gand pi Auguste Dewailly. I n’o in eute qu’ch’est Alphonse Décaix-Matifas : chti-lo j’l’rinconte coère assez souvint à ch’Consel ed chés échevins vu qu’ej nin foais pertie edpus l’énée 1888.
Mi, j’o rimpli min bultin d’achuchonnage avu l’Société d’Hortitchulture in 1889, meume si qu’ej n’y connoés rien du toute à chés plantes !
Pinsez don kmint qu’j’o été ébeubi quand l’dénonmé « Decaix-Matifas », ch’présidint, i m’o dmindé ed foaire in discours pindint chl’assannée générale à l’date d’ech 22 ed févérier d’l’énée 1891.
Por nin définir, ej li dis « ouais » mais quand meume, j’confesse edvant tous chés gins qu’ej n’y connoés rien du toute din ch’monde ed l’hortitchulture. L’séinche-lo ale s’passe din chl’Hôtel ed Ville pi j’o donné à min discours el l’tite ed « Trop d’fleurs ».
Deus énées is pastte pi mé vlo coére edmindé por éne réunion qu’ale est gramint importante, ch’est l’chinquintième d’el Société d'Hortitchulture. L’date qu’ale o été coésie, ch’est ch’25 ed févérier d’l’énée 1894. Cha s’passe din ch’Chirque, chti-lo eq j’o ineudjuré mi-meume in 1889.
I m’prind l’pécavi ed dire, avuc granmint ed maliche chés miséres de chti à qui in dminde ed présider éne réunion : « Ch’Présidint margré li ».
Et pis à ch’momint ed l’ouverture in règue d’ech batimint din l’rue du Boucaque (énuit ch’est l’rue Le Nôtre), ch’27 ed march 1898, mi, j’su coère lo mais j’freume m’bouke, cha n’est point mi qu’ej perle...
