Ech Nauti-poulpe
« Bérade j’o ieu l’bénajté d’aprène qu’o voloét foaire du téyate aveuc mes romans, pi coér nin foaire d’s espectacs ed cabotins obin d’s imaches animées amoutrées dsu in écran. O lonme cha « el cinématographe » pi cha té rinvinté par chés frères Lumières in 1895. Mais, djo din s’z énées 1880, i n’y avoét ieu d’s artisses qu’is avoètte ieu ch’pécavi ed perzinter mes romans aveuc des dessins l’in dsu l’eute, aveuc chés textes, conme chés imaches d’Epinal, éne sorte ed litérature in estampes.
Gramint d’énée après cha, i n’y o ieu éne neuvièle mode pour raconter d’histoères qu’cha s’lonme des bindes à dessins. I m’sanne à vir qu’j’o inspiré Benoît Peeter Peeters pi François Schuiten. Din leu sieute des Cités Obscures (dépuliés par Casterman), is ont pourlongé m’s univers in foaisant d’mi in d’leus personnaches ed ficcion din L’Enfant penchée, in 1987.
Adon, in 2018, ch’dessineu François Schuiten, pi chl’esculteur Pierre Matter, is ont rinvité in bétal à mitan poulpe pi à mitan sous-marin qu’is s’in vo vnir rester, après in long voéyache, din m’boène ville d’Anmiens. A keuse d’éne rédrie du destin, qu’j’éroés ieu tant kér ell écrire pi l’manginer mi-même, ch’Nauti-poulpe i est edvnu in personnache ed ficcion, éne binde à dessins, Le retour du Capitaine Nemo, doù qu’el ville d’Anmiens pi mi os juons in role chintral. »
