Ch’monumint Jules Verne
Ch’est ch’neu d’moai 1909 qué chl’Académie des Sciences Lettres et Arts d’Amiens ale ermet oficielmint, in cadieu, ech monumint à l’ville d’Anmiens. Cha s’foait pindant éne belle-et-grandé cérémonie. Ch’est éne ménière ed rinde honmage à Jules Verne qu’i avoét été éli in 1872 conme mimbe titulaire de chl’Académie. I s’avoét moutré fin réguiller à ches séinches pi i nn’avoét été ch’dirigeu in 1875, pi coèr après in 1881. Quand qu’ech grand écriveu il o défuncté, ch’24 ed marche 1905, ch’l’Académie ale tout d’suite lanché ène souscripcion publique pour rassanner chl’ergint qu’i faloét pour pouvoér l’ahanser..
Pindant chl’inauguracion, i o ieu d’grandés fètes in perzince ed gramint d’gins qu’is étoétte granmint connus. I avoét Mme Honorine Verne, s’fanme Jules Verne, sin fiu Michel, ses troés tchots-fius et pi Jules Hetzel fiu, qu’ch’étoét chl’éditeu à Jules Verne.
L’posture qu’ale o été escultée par chl’artisse Albert Roze ale amoutre Jules Verne à ch’bel age. I mile l’imminsité, i rsanne à ch’capitanne Hatteras, qu’ch’est in d’ches francs capitannes qu’os ertreuve din ses romans. Ches tites ed ches pu célèbes romans d’ches « Voéyages estrordinaires » is sont gravés drière el stèle.
Chl’esculteu Albert Roze, ch’est étou chti qu’il o foét ch’monumint funéraire Jules Verne, qu’il est délonmé « Vers l’immortalité et l’éternelle jeunesse » pi qu’i s’treuve din ch’chimintière d’el Madeleinne.
Traduction Julie Boivin pour l'Agence régionale de la langue picarde
