Jules Verne din s’vie d’tous les jours
Invnu Anmiens in juyet ed mille huit chint soéchante et onze (1871), j’o décidié ed m'ablotcher din « l'moaison à l’tour » , à ch'deus d'el rue Charles-Dubois, in octobe ed mille huit chint quater-vinte deus (1882) pi j’o resté lo dusqu'in mille neu chint (1900). Dz’eutes indroéts is éroétte pu ête lonmés "El moaison Jules Verne", conme ech quarante quate d'ech boulvard Jules-Verne d'énui.
A ch'momint lo, j’su au pu heut d'eme gloère. Ej su connu tout partoute din l’monde pour mes "voéyages estrordinaires". Chele démeure dù qu’ej reste ale est à l’émzure d’eme russite populaire. J’n’y baille des bals in rabillure, j’erchus des jornalisses ed tout partoute din l’monde pi ej leu foais visiter l’moaison. Tertous i est ébleuï par el rikèche d'eme biblotèke pi i s'ébeubit edvant l’simplichité ed min cambinet ayoù qu'j’ouve. Os prins des fotos d’el grande plache principale, pi étou ed mi aveuc em dame Honorine dsu ch’pos d’porte d’ech gardin d’ches courts jours, o bin coèr ed mi pi min kien din ch'gardin.
El vile d'Anmiens ale o acaté chele moaison in 1980. Enuit, zz’Anmiénoés o bin ches tourisses du monde intier, is peutte s’y infiker comme din in live. Din ches plaches d'in bos, quand qu'os intind craquer ch’planket, qu’il est d’ech tans d’adon, os croèroét qu'ej m’in vos vnir os akeuiller.
Os vous ratind, os ètes à mon Jules Verne
Traduction Jean-Paul LEJEUNE pour l'Agence régionale de la langue picarde
